:: عمري يضيع ::

اليوم رحت فريجنا الجديم وقلت بلعب كره هناك

شو نسوي مو محصلين ملاعب نلعب فيها
:(

وطبعا من فتره طويلة ما رحت ولا مريت

اول ما وصلت شفت اشكال غريبة وعجيبة

قلت معقوله كل الناس تغيروا !!!

لين ما حصلت لي شكل مألوف وما صدقت ...

واشر لي انزل من السياره وتعال

وانا على طول بدلت ملابسي في السياره ونزلت

قلت بيلس برع اشوفهم الو شيء وعقب بدخل لاني متارخ اشوي

يلست برع اطالع لعبهم واتذكر ايامي يوم كنت في عمرهم

حسيت باحساس غريب .. عجيب ...

حسيت اني ما عشت المرحلة هذي في عمري !!!

وكانها مرحلة من عمري ما شتفها ابد مع ان زماننا كان بسيط جدا وحلو

حسيت اني اختصرت من عمري الكثير والكثير

شفت عمري الحين 27 سنه والحمد لله

لكن شو سويت للحين ؟

ولا شيء

عايش مثل ما انا من تخرجت من الكليه ولليوم ما تغيرت ابد
بيت ... ودوام ....

بعد كل هذا اكتشفت اني ضيعت من عمري أكثر من 7 سنين راحت والله اعلم كيف راحت و وين راحت.

يلست افكر في الي هم في سني وعمري

شفتهم معرسين وما شاء الله عندهم عيال ...

ومنهم الي دخلوا عيالهم الروضه والمدرسه....

وانا مثل ما انا ...

تخيلت الموقف بعد سبع سنين من اللحظة هذي ...

راح اشوف الصغار الي يلعبون كوره كبروا وعندهم عيال...

وراح اقول احس اني ما عشت اللحظه هذي من عمري...

باختصار عمري يضيع بطريقة غريبه ...

واذا ظليت على حالي راح يضيع ويضيع وانا ما اشعر فيه...

احساس مر وصعب أنك تعيش زمانك وما تحس فيه

:(

وتندم على ضياع هاي الايام من العمربالطريقة هذي

متى تتحقق الأحلام ... إذا حتى الحلم بحساب

..أبحث عن حزن وجهي

..بين إنحنائات الشوارع

..أسأل هل ياترى مشينا الدروب

أم تراها مشتنا هي؟؟

فكم من شارع مشيناه عمراً؟؟

..تمنينا أنه سيُسكن أحلامنا في القمر

..فأسأل إن كان للحلم جدوى

..فنحن لن نغيير القدر

..أبحث عن حزن وجهي

!!اللذي يطويه الألم

..فأمسى شارداً

..ضائعاً

..خائفاً

..لم أجده

..................................................

وانا اقرى هذه الخاطرة الجميلة اليوم

والتي اعتدت ان اقرها بين فترة واخرى

ولا امل من قرائتها فهي تشدني كثيرأ

وانا هنا اقتبست جزءأ بسيطا منها

"لا ادري لماذا أتت على بالي اغنية المسلسل الخليجي "الدريشه

غريبه هذي الدنيا

من اولهـا لآخرها
نجيـها زايرين أغراب
ونرحل عنها أغراب
..:..
نجي وأحلامنا دايم
مرام الفكر آسرهـا
متى تتحقق الأحلام
إذا حتى الحلم بحساب
..:..
غريبه ننولد أحرار مع الناس ونعاصـرها
ولكن حلمنـا مسجون ودونه ألف باب وباب
اهي دنيا وعلى كل حال

غصب عنا نسايرها

عجب موالها موال
مصالحنا اعز أحباب
..............................................

هل حقا هذا واقعنا

وهل اصبح الحلم شيء من الصعب تحقيقه

وهل وصلنا لمرحلة انه من الصعب ان نجد احباب لنا فيها

وان المصالح هي من تطغى على كل شيء ؟

اذا وصلنا لهذه المرحلة فنحن فعلا مفلسون

وستصدق مقولة

اهي دنيا وعلى كل حال

غصب عنا نسايرها